Panjadihon Ni Mulajadi Nabolon Di Nasa Na Tubu Dohot Na Manggulmit Rodi Na Habang

Dung ditompa si Borudeakparujar tano on, hornop jala bidang, diala saesae dope, gabe didok ma tu Leangleangmandi: “O, ale Leangleangmandi! Nunga sidung tano on tinopa, alai tartaon ngalina ala so adong inganan. Ala ni i pangido ma jolo tu Mulajadi Nabolon, suansuanan di tano i”. Dung i laho ma Leangleangmandi untunguntung na bolon paboahon pangidoan i tu Mulajadi Nabolon.

Dung i disuru Mulajadi Nabolon ma bahenon ni Bataraguru nasa boni ni suansuanan dohot na tubu, na habang  dohot nasa na manggulmit tu bagasan arungarung, dung i dilangkopi ma arungarung i. Didok ma tu Leangleangmandi: “Na, boan ma on tu si Borudeakparujar, alai tung na so jadi do i ungkaponmu di tongan dalan.

Molo tung diungkap ho i, ingkon hona uhum do ho. Pasahat ma songon i tu Borudeakparujar, jala dok ma tu ibana: Ungkap ma arungarung on, alai jolo hembangkon ma lagelage tiar humaliang, ndang jadi mabiar ho marnida angka na ruar sian bagasan arungarung i, laos bahen ma goar ni angka i!”

Dung i dipatolhas Leangleangmandi untunguntung na bolon ma arungarung i dohot angka tona i tu si Borudeakparujar. Dung di ungkap si Borudeakparujar arungarung i, mangangkat be ma tutu sian i: Boni ni duhutduhut, hau marmansammansam, golukgulok, ragamragam na manginsir dohot na mardalan pat. Na habang dohot saluhut ragam ni na tubu di hasiangan on.

Dung i longang ma si Borudeakparujar marnida na tubu i dohot nasa na manggulmit, ai saluhutna i, lam martamba do balgana dohot ganjangna be. Saluhutna i adong be  jantan dohot boruboru.

Di laonlaon ni ari lam balga ma hau di tombak i. Jadi adong ma bahen parhau ni inganan ni si Borudeakparujar di hutana na margoar: “Sianjurmulamula”. I ma margoar “Batakna”.

Sipaboa tingki pe adong do di angka na tinompa i, i ma manuk, pidong ambaroba, paboa tiur ni ari sihosari, i ma paboa hos ni ari; sese, i ma paboa bot ni ari; pidong sosoit, araroma paboa taon. Ala ni i ringan ma roha ni si Borudeakparujar maringanan di tano on. Holan sada nama arsak ni rohana, i ma ala so adong dope donganna mangkatai dohot mangula ulaon. Jadi holan ibana sambaing dope mardalandalan di atas tano i.

Sumber: Dikutip Dari Buku Pustaha Batak Tahun 1991

Taringot Tu Si Raja Indainda Dohot Borusorbajati

Dung sidung tano di topa si Borudeakparujar, mangkatai ma Tuan Dipapantinggi dohot Tuan Sorimahummat, songon on: “Ia si Borusorbajati ma tabahen di si Raja Indainda!’

Asa dung dos tahinasida, di hatai nasida ma asa maroroan si Borusorbajati tu si Raja Indainda so sian pamotoan ni Bataraguru.

Alai atik pe naung maroroan nasida, laos so hea do nasida pajumpang. Jadi didok si Borusorbajati ma tu ibotona Tuan Dipapantinggi dohot tu Tuan Sorimahummat: “Ale ito, nunga nian dipaorohon hamu ahu tu si Raja Indainda, alai laos so hea do hami pajumpang, ala so olo ibana ro. Ingkon masipaidaan do halak na maroroan nian, hape anggo hami ndang songon i. Asa ahu nama laho manopot Raja Indainda. I do umbahen didok halak: “Pangaririt baoa, pangariritan do boruboru”. Hape dang hanangkohan si Borusorbajati tangga ni jabu ni si Raja Indainda, ala pitu tanggatanggana i, jala songon raut parnabung tajomna. Ala ni i sai joujou ma si Borusorbajati sian toru, ala ndang olo si Raja Indainda mangalusi. Lam martabuni do ibana tahe tu bonggarbonggar, nanggo mandulo pe so olo.

Alai atik pe songon i lam manggogo do si Borusorbajati manjoujou, atik beha na modommodom ibana, ninna rohana. Jadi mangkuling ma Nan Bauraja iboto ni Raja Indainda, ninna ma: “Ale eda, anggingku! Ua marende ma ho jolo asa dibege raja!’

Dung i marende ma si Borusorbajati, ninna ma: “Leangleangmandi tambiringkon holiholi; baoa pangolin, tailihon boru nioli!’ I ma mula ni ende di angka na marbaju, molo ro pangaririt.

Dung i marende ma antong Raja Indainda, mangalusi endeende ni si Borusorbajati, ninna ma: “Mapopomapopo siala ni halak, anggo si alangku ndang olo mapopo. Manongosmanongos iboto ni halak, anggo ibotongku ndang haru manongos. Alai hudok pe songon i, tompu ma sada sabungan ni obukmi, dung i ullushon ma tu balatuk i. Molo magotap do, unang ma ho ro. I ma tandana paboa na so boi bolusonmu tangganami i. Alai molo so magotap, i ma tandana paboa na boi ho ro tuson”.

Dung i ditompuhon si Borusorbajati ma obukna, jala diombushon tu balatuk i, gabe magotap ma. Jadi mulak ma ibana sian tangga i, laho mangalualuhon tu Tuan Sorimahummat dohot tu Tuan Dipapantinggi.

Dung i dipaborhat nasida ma ibotona i dibahen ma parhobolon, asa boi mandegehon tangga i. dung i borhat ma ibana huhut manjoujou songon nangkin, alai ndang olo mangalusi. Suang le do hatana mandokkon manompu obuk i dohot mengullushon tu balatuk i. Jadi dioloi si Borusorbajati ma i, alai ndang olo be tos obukna i, gabe nangkok ma ibana tu jabu i.

Alai mabiar do si Raja Indainda patuduhon dagingna, na songon ilik sirajaodong i, gabe manginsugut ma ibana tu solotsolot ni ninggor, gabe laos mate hapusohan disi ma ibana.

Dung i mulak ma si Borusorbajati mangalualuahon it u Tuan Sorimahummat, Tantan Debata dohot tu Tuan Papantinggi, didok ma tu ibotona i: “Olo tutu do nidokmu i ale siraja Ibot; ndang adong songon si Raja Indainda. Alai atik pe songo i molo naeng sout do ahu di ibana ingkon jolo margondang ma hamu, asa manortor ahu. Dung i dioloi ma pangidoan ni ibotona i. Dung diboto Bataraguru i, muruk ma ibana tu angka anakna i ninna ma: “O hamuna angkana oto! Tung na so tama do na binahenmuna i, sitongka do padomuon halak na mariboto. I do Alana umbahen pintor mati si Raja Indainda”.

Dung i didok ibotona i ma: “Anggo apala gondang dipangido, aha ma salana?”

“Ba, rohamu nama disi, ndang hupabotoboto i”, ninna Bataraguru. Dung i didok si Borusorbajati ma tu Tuan Sorimahummat, Tantan Debata dohot tu Tuan Dipapantinggi: “Ale ito! Parningotanmu ma na hudok on: “Ia hobas pangula, ba pangula ma ahu da, ito. Ia hobas partoba, ba partoba ma ahu da, ito! Ia hobas partigatiga, partigatiga ma ahu da, ito! Ia hobas naposo, ba naposo ma ahu. Ia hobas natuatua, ba natuatua ma ahu. Asa damang ibotongku, datulang manang na songon dihangku pe, sudena ma i paribanhu. Na so marpantang na so marbesan nama ahu! Ia na nidokmu i nunga huoloi, ba olio hamu ma pangidoanku, rimberimbei hamu ma ahu, asa manortor ahu sagondang nari”. Dung i dioloi nasida ma i, jadi buni ma olat ni rungkungna tu toru. Jala dung diungkap nasida rimberimbe i diida ma bonom tu tano olat ni rungkungna tutoru. Dung i mangkuling ma si Borusorbajati ninna ma: “Laho ma ne hamu, ida hamu ma si Raja Indainda, songon ilik do hape ibana. Nunga mate tarsolot ibana nuaeng di ninggor ni ruma ni Amanta Debata Sori”. I ma jumadi siganding surusuruan ni Debata Jujungan.

Dung i ninna ma: “Ianggo ahu, na mate ma ahu, alai tubu ma sian matangku siamun on “bagot” jala sian hambirangku, “hapursia”.

Dung i didok Bataraguru ma: “O, hamuna ale angka anaha! Na so mangoloi pandangki, beha do diida hamu ujung ni pambahenanmuna i? nda hona toru do na mangulahon na so uhum? Ingot hamu ma i tu joloan on!”

Sumber: Dikutip Dari Buku Pustaha Batak Tahun 1991

Si Borudeakparujar Dohot Raja Padoha Na Deba Mandok

Di na mangaririt Raja Odapodap tu si Borudeakparujar, dilehon ma tintinna tandana. Hape din a laho maridi si Borudeakparujar tu mual, toho madabu ma tintin jinalona i tu ruang na torus tu banua tonga on. Jadi pintor ditangkup Raja Padoha ma tintin i tu tonga laut, ai naung didabu Mulajadi Nabolon do ibana jumolo tu toru on, ala ni jungkatna. Jadi dipartintin Raja Padoha ma tintin na tinangkupna i.

Dung i didabu si Borudeakparujar ma urutanna tu tano on (toding banua tonga on). Dipatuduhon ma ujung ni boning i di topi ni ruang i, sian i ma ibana mangarunsur mangalului tintinna i. Dung i diida ma, hape nunga dijarijari ni Raja Padoha tintin i, gabe mengkel ma ibana. Ala denggan ni ipon ni si Borudeakparujar diida Raja Padoha, gabe didok ma: “Ale boru ni rajanami, ia pauli ma iponhu songon iponmi, huoloi pe manang beha pandokmu!” “Denggan” ninna si Borudeakparujar.

Jadi ditonahon si Borudeakparujar ma tano pitu pohul topaonna dohot beangan bosi rap dohot golanggolang, tumbaga, sere, perak, songon i dohot nanggar sian Mulajadi Nabolon. Jala dung dijalo sudena i dibeangkon ma Raja Padoha. Dung so tarrunta Raja Padoha be dienet ma tintin i.

Dung i diumban ma ipon ni Raja Padoha, gabe mangangguk ma ibana, ninna ma: “Hansit do ale boru ni rajanami!”

“Taon asa denggan iponmu!” ninna si Borudeakparujar.

Mangasa gogo ma Raja Padoha mangarunta, pola adong deba sian beangan i angka piltik tu tano tinopa ni si Borudeakparujar; i ma gabe parmulaan ni bosi, tombaga, golanggolang, sere, dohot perak di tano on. Alai laos so boi do runtaon ni Raja Padoha beangan i.

Dung i sai didatdati si Borudeakparujar ma manopa tano i, lam tarhungkup ma Raja Padoha. Dung i mulak ma si Borudeakparujar tu amana Bataraguru mangalualuhon saluhut pambahenna di banua tonga. Jadi longang ma amana i. “Rupa boru na ripe sipaidaida on ni halak do on huroha. Ala ni i binahen mai tu bulan an, rap dohot sorbana i, asa dipaidaida tano na tinopana i”. Jadi saut ma i diampehon. I ma na tarida di bulan i, gombaran ni si Borudeakparujar do i didok torsatorsa i!

Na deba mandok si Leangnagurasta do na di bulan i.

Sumber: Dikutip Dari Buku Pustaha Batak Tahun 1991

Si Borudeakparujar dohot Raja Padoha

Ia dung sidung banuaginjang dibahen Mulajadi Nabolon ro di pangisina, ditompa muse ma banua tonga marhitehite si Borudeakparujar; ai ditopa ma tano na sampohul i, di atas aek laut i. Santopap ditipap, rap ganda do bidangna dohot hapalna. Molo sansogot manopa ibana, dalanan sadari ma bidangna. Ia dua ari ibana manopa, dalanan dua ari ma bidangna. Sai songon i ma didatdati si Borudeakparujar manopai paima bidang tano i. Alai dung diida Mulajadi Nabolon, bidang dohot hornop ni tano tinopa ni si Borudeakparujar, disuru muse ma Leangleangmandi mangalap si Borudeakparujar asa mulak tu banuaginjang: “Nunga mahap roha n ii di topatopana i, huhut masihol ibana dohot Ahu”, ninna Mulajadi Nabolon. Hape tongtong do manjua si Borudeakparujar boanon ni Leangleangmandi tu banuaginjang.

Ala ni i disuru Mulajadi Nabolon ma Raja Padoha mandapothon si Borudeakparujar tu tano on; anggiat olo mulak tu banuaginjang si Borudeakparujar hinorhon ni sogo ni rohana tu Raja Padoha. Alai manjua do Raja Padoha, ala so ibana nampuna oroan di si Borudeakparujar. Ai pantun do tahe hangoluan, tois hamagoan, ninna rohana di bagasan, i ma mulani : “Na so jadi dapothononhon oroan ni dongan”. Songon nidok ni umpama: “Silaklak ni dandorung tu dangka ni silasila, ndang jadi iba jumonokjonok tu na so oroanniba”.

Dung i didok Mulajadi Nabolon ma tu Raja Padoha: “Laho ma ho tusi; unang haori ibana. Alai huturhutur ma tano tinopana i asa matolbak, asa biasan ibana, anggiat ala ni i olo ibana mulak tu banuaginjang”.

Dung i diusung Leangleangmandi ma Raja Padoha tu toding banua tonga. Sian na dao diampehon Leangleangmandi Raja Padoha i, asa unang diida si Borudeakparujar. Dung i mulak ma Leangleangmandi tu banuaginjang. Jadi duhuturhutur Raja Padoha ma tano i, gabe angka bola ma sude. Jadi tarsonggot ma si Borudeakparujar huhut humitir. Sampak ma mudarna, magilang siatena. Hapogan ma ibana jongjong tu tungkotungko sipitu tanduk sisia ulu huhut mamereng humalian, ai sai digadoburi Raja Padoha do aek i, huhut martanjungi ibana. Asa tung gadobur do jala gunsang laut i, sude huhut marpompasan tano i, hinorhon ni gogo ni Raja Padoha i.

Dung i marhusari ma roha ni si Borudeakparujar: “Dia do ulaning ala umbahen masa songon i? Dung i tindang ma ibana di tungkotungko i, huhut manjoujou: “O, ale Leangleangmandi untunguntung na bolon! Alusi ahu jolo, ai ndang huboto be na masa on!”

Dung i disuru Mulajadi Nabolon ma Leangleangmandi manopot si Borudeakparujar. “Aha do na nidokmu di ahu!” ninna si Leangleangmandi. “Umbahen na hujou ho, na martompasan do tano na hupauli i, so huboto alana umbahen na songon i. On pe asi ma roham, alapma tano sampohul nari tu Ompunta Mulajadi Nabolon, asa huulahi manopa tano i!”

Dung i mulak ma Leangleangmandi tu banuaginjang pasahathon pangidoanna i tu Mulajadi Nabolon, jadi ditongos ma tano sampohul usungon ni Leangleangmandi tu si Borudeakparujar. Dung i ditopa ma tano i mangulahi songon pambahenna parjolo i, gabe denggan ma muse tano i.

Alai dijururi Raja Padoha ma borngin i tu bona ni tungkotungko sipitu tanduk, sisia ulu. Ditiop ma tungkotungko i gogo huhut dipahuturhutur, jadi lalolalo ma tano i. Dung i muningan ma roha ni si Borudeakparujar: “Aha do ulaning na manegai tano on mangulahi” ninna rohana di bagasan.

Dung i dipasang si Borudeakparujar ma paralamatonna, gabe diida ma na mangkuturi i, jadi didok ma: “Ise do ho na manggadoburi i, rupa na rumintop do huroha tanganmu!”

“Ah ahu do on Raja Padoha, siaji dongordongor ni portibi, sigunsang aek ni lautan!” ninna. Huhut didok muse tu si Borudeakparujar: “Boasa sai dison ho, ai sai mulahulak do Leangleangmandi mangalap ho, asa padomuonna ho nian tu Raja Odapodap!”

Dung i muruk ma si Borudeakparujar, mandok: “Rias pe di ginjang siala pe di toru; disintak pe tu ginjang, ditombomhon pe tu toru, ndang na olo ahu tu Raja Odapodap, ulaonkon do na rumingkot di ahu!”

Dung i dijou si Borudeakparujar ma Leangleangmandi, disuru ma ibana mangalap napuran tu namboruna Nan Bauraja dohot Narudang Ulubegu satiktihan be. Jadi laho ma Leangleangmandi i mangalap napuran i. Diboan ma i jala dilehon tu si Borudeakparujar. Ia dung dipangan si Borudeakparujar napuran i, gabe songon garage ma ibana songon garugu; na sada do ibana songon na pitupulu. Diborsikkon ma aek ni napuranna it oho tu abara ni Raja Padoha, marrara ma diida jala denggan.

Dibereng Raja Padoha ma parrara ni bibir dohot parhillong ni ipon ni si Borudeakparujar, gabe disungkun ma si Borudeakparujar manang aha i, asa dilehon deba di ibana. Dung i didok si Borudeakparujar ma: “Miakmiakni ompunta do i, sipadenggan pusupusu, sipahombang ateate, sipaulak hosa loja. Angka hasurungan ni hami boru ni raja do i, tanda ni hapantunon dohot paradaton!”

“Antong molo i do hape, lehon ma di ahu, ai ahu pe anak ni raja do, asa marpantun ahu jala maradat dohot tu hamuna!” ninna Raja Padoha.

“Denggan” ninna si Borudeakparujar; “alai ingkon oloanmu manang aha na hudok. Beangkononku ma ho jolo tu beangan bosi, asa hulehon di ho i. Haru i, molo naeng dope umuli di ho, ingkon beangkononku ma patmu, gontingmu dohot tanganmu!”

Marnida hinauli ni si Borudeakparujar, tubu ma di roha ni Raja Padoha mandok hatana tu si Borudeakparujar, laos ninna ma: “Ia nunga manjua ho tu si Raja Odapodap boru ni rajanami, au tapasaut ma langkanta dison!”

Umbege i, lam sogo ma roha ni si Borudeakparujar di Raja Padoha, alai ndang dipataridahon sian pangkulingna, ai didok ma: “Jolo tapasaut ma pangidoanmu parjolo i, asa lam uli ho” ninna.

“Antong manang songon dia pandokmu, denggan!” ninna Raja Padoha, huhut didok rohana dibagasan “Anggo apala beangan songon na nidonna i, nanggo huropukropuk i!”

Dung i disuru Borudeakparujar ma Leanglaengmandi mangido beangon bosi sian Mulajadi Nabolon, dohot paboahon hata ni Raja Padoha i. Jadi dipasahat ma tona i tu Mulajadi Nabolon. Dung i muruk ma roha ni Mulajadi Nabolon di Raja Padoha, na naeng mangarohai si Borudeakparujar i, i ma mulana siuhumon halak, molo dibuat oroan ni halak na asing. Jadi ditongoshon ma beangan bosi na togu situtu. Laos Raja Padoha do pabongothon dagingna tu beangan i, ala ni lomo ni rohana di na pangidona i.

Dung i didok si Borudeakparujar ma mandok raja Padoha: “Antong runta ma jolo beangan i, mangasa gogo ma ho, asa pinaujung pangidoanmu”. Ia di roha ni si Borudeakparujar asa diboto manang naung togu, na so boi be runtaon ni Raja Padoha. Jadi di runta ma antong, sega ma beangan i.

Jadi marsak ma roha ni si Borudeakparujar, ditonahon ma muse rante na pinauli sian ateate ni bosi. Dung i diboan Leangleangmandi ma i tu banua tonga, jadi dirantehon ma i tu Raja Padoha huhut ditambathon tu tungkotungko sipitu tanduk sisia ulu, asa tung momos. Dung i dirunte Raja Padoha ma muse; alai ndang humurtik be i. “Borudeakparujar, lehon ma na hupangido i!” ninna Raja Padoha.

“Olo da, paima satongkin nari” ninna si Borudeakparujar. Dung i dipangido si Borudeakparujar ma muse tano pitu pohul, sian Mulajadi Nabolon, laos ditopa ma i di atas ni Raja Padoha. Jadi lam bidang ma jala lam hapal, gabe lam dilonongkon ma Raja Padoha i tu toru. Dung i didok ma: “Bo, songon na lam holip do ho sian ahu, ale boru ni rajanami, dia do binahenmu tu ahu?”.

“Olo da, nda na jungkat do ho tu ahu? Ai disegai ho do tano na hutopa i, ai aha dope nidokmu, sip ma ho!” ninna si Borudeakparujar mandok Raja Padoha.

Dung i manggogo ma Raja Padoha mangalalo tano i, ninna ma: “Hulalo ma tano tinopam on!”

Alai ni i didok si Borudeakparujar ma: “Nunga husuhulhon ho tu bona ni tungkot tudutudu tualang na bolon, sisia ulu (tungkot ni Mulajadi Nabolon). Jadi jut ma roha ni Raja Padoha ala so sadia tarbahensa be mangalalo tano i, ala naung dibeangkon ibana tu tungkotungko i.

I ma umbahen didok halak: “Suhul” molo ro lalo. Asa ndang olo sega be tano na tinopa ni si Borudeakparujar i, olat ni na marongrong nama, i ma jumadi lombang liung, jala deba tano i marbuntul, i ma jumadi dolok. 

Sumber: Dikutip Dari Buku Pustaha Batak Tahun 1991

Hararat Ni Pangisi Ni Banua Ginjang

Dung in dang piga bulan nari, hu ma di bulanna, gok ma di taon, manggora ma pamuro di nioli ni Bataraguru, Dabata Sori dohot Balabulan.

Jadi tubu ma anak ni Bataraguru ima na margoar:
- Tuan Sorimahummat, i ma parmulaan ni si Bursok, sitiop panguhumon, parmulaan ni harajaon.
Tubu muse ma dohot boruna onom halak, ima:
- Borusaniangnaga
- Sitapigaga
- Si Borumalim
- Si Borusorbajati
- Leangnagurasta
- Si Borudeakparujar (Sideakujarujaran) na marmulahon tano, na manubuhon jolma tu banua tonga on songon nidok ni umpama: Timus gabe ombun, ombun jumadi udan, mula ni tano dohot jolma sian si Borudeakparujar, songon sibegunta anon!

Dung i tubu ma anak ni Debata Sori, ima namargoar:
- Tuan Sorimatinggi, mula ni hamalimon dohot
si Raja Indapati, jumadi Siganding, i ma surusuruan ni Debata jujungan.
Tubu muse ma dohot boruna ima:
- Boru Nan Bauraja, Borusurungan, mula ni junjungan ro!

Dung i tubu muse ma anak ni Balabulan, ima na margoar:
- Tuan Dipapantinggi na marmulahon hadatuon dohot pangulubalang.
Tubu muse ma dohot boruna ima na margoar:
- Narudang ulubegu, i ma mula ni naganaga ni sombaon, i ma partubu ni angka na di banua ginjang.

Dung magodang be nasida disuru Mulajadi Nabolon ma Leangleangmandi patolhashon tu Manukmanukhulambujati; asa dilehon si Borudeakparujar gabe na niolini Raja Odapodap. Nan Bauraja gabe na nioli ni Tuan Dihurmajati Narudang ulubegu gabe na nioli ni Raja Padoha.

Hape dung dipatolhas Leangleangmandi hata i tu nasida, marsidalian be do laho manjua tu na mangoro nasida be. Ai marguru tu olo ni si Borudeakparujar do, olo ni boru na dua nari; alai marguru tu sidung ni urutanna do olo ni si Borudeakparujar. “I ma mula ni parsidalian on”.

Dipangido Siborudeakparujar ma hapas pitu gumball sian Mulajadi gantionna bahen bonangna. Dung pe gabe ulos i ninna asa na poso balga ni urutanna i. Aha ma so songon i, ai ginantina na bodari, Songon eme na bibi di rungkungna digotapi, roha ni Raja Odapodap sai diotapotapi. “I ma mula ni na manjua”

Dung i roma Mulajadi Nabolon dohot Leangleangmandi, dibereng ma urutan na di gantian ni Sideakparujar i, sai tongtong na sapining balgana. Ala n ii disampathon ma urutanna i tu alaman ni Bataraguru, jadi lonong ma mansai bagas, ndang boi be dienet sian i.

Jadi marsak ma roha ni si Borudeakparujar, dipangido ma pangurupion tu Mulajadi Nabolon. Dung i didok ma tu si Borudeakparujar: “Buat ma tungkothu, tudutudu tualang na bolon i. Pantikkon ma i tu lambung urutanmi, dung i enet ma ngernger”. Jadi dibahen si Borudeakparujar ma songon na nidokna i, hape lam lonong do urutanna i, alai lohot do punsu ni boning di sorhana i.

Madabu ma urutanna i, harhar tu toru jala i ma ditiop si Borudeakparujar mambalambal tu banua tonga, tu atas ni aek. Jadi pantik ma parbatu ni urutan i dohot tungkot tudutudu tualang i tu laut, gabe i ma hajongjongan ni si Borudeakparujar, margoar ma i: “Sipitu tanduk, sisia ulu”. Asa i ma mulana, sipinsangon do na so mangoloi ajar. Jadi tarpunjung ma si Borudeakparujar, songon hau sisadasada, songon tanding na hupuloan, sirang sian banua ginjang. Ala n ii sai mangandungi ma ibana mandok: “Hansit ngotngot gota ni si margalagala, hansit dangol hutaon, ala so siat hata”. I ma mula ni “hansit taonon ninna so pasiat ajar”.

Jadi disuru Mulajadi Nabolon ma Leangleangmandi untunguntung na bolon, mangalap si Borudeakparujar mulak tu banua ginjang. Alai ndang olo be ibana, ai diboto do rudangna, rudang sialagundi, diboto salana, dumenggan martabuni, ala gigi ni rohana tu Raja Odapodap. Sian on tarida parulakhulak do roha ni Debata tu jolma. Alai ndang na olo jolma mangoloi sogo ni rohana, i do bangko na so tarpauba.

Dung i didok si Borudeakparujar ma tu Leangleangmandi: “Ndang olo be ahu tu banua ginjang, dumenggan ma ahu di toru on”. Alai asi ma roham di ahu, pangido ma tano tu Ompunta Mulajadi Nabolon, asa hutopa i bahen ingananku di toru on”. Dung i dipasahat Leangleangmandi ma hata pangidoanna i, alai ndang dioloi Mulajadi Nabolon. Lam disuru dope tolu hali nari Leangleangmandi paulakkon si Borudeakparujar tu banua ginjang. Alai dung pate roha ni si Borudeakparujar na so olo be mulak, dioloi Mulajadi Nabolon ma pangidoanna i, ditongos ma tano sampohul.

Sumber: Dikutip Dari Buku Pustaha Batak Tahun 1991

Panjadihon Ni Debata Di Tolu Boruboru Di Banua Ginjang Dohot Hasampuronna

Asa dung diida Manukhulambujati na onom i tubu sian pira na tolu i, las ma rohana. Alai huhut marhusari, ala so di boto manang beha bahenonna i. Ala ni i didok ma tu Leangleangmandi untunguntung na bolon: “O, ale Leangleangmandi untunguntung na bolon, ia andorang pira (tinarungku) najolo, mabiar do ahu midasa; alai anggo nuaeng asing do hatangku sian pingkiranku ai beha ma bahenonku mangulahon angka nasida nuaeng. Dibahen i laho ma ho manungkunhon it u Ompunta Mulajadi Nabolon, asa dipaboa manang dia bahenonku tu angka na tubu on”.

Dung i dipatolhas Leangleangmandi ma i tu Mulajadi Nabolon. Jadi didok ma tu Leangleangmandi untunguntung na bolon: “Dokkon ma dijagai Manukmanukhulambujati angka anak i disi! Unang ma pola holsoan ibana; ai Ahu do umboto manarihon i, dada tuk anggo holan pingkiranna. Alai anggo on: Boan ma bulu sitolu buhu on, (pula pogu ganjangna be), dung i pampagohon ma i humaliang Manukmanukhulambujati. Dung i boan muse, ma sampulusada putik dahanon on panganonna, alai samputik ma i dipangan ganup bulan”.

Dung i dipatolhas Leangleangmandi ma saluhut tona it u Manukmanukhulambujati. Diulahon ma i mangihuthon pandok ni Mulajadi Nabolon.

Dung sidung dahanon na sampulu sada putik i, rumintop ma tutu pamangan ni Manukmanukhulambujati, jadi dilotakkon ma munsungna i tu bulu sitolu buhu i, gabe mapuntar ma i, jala ruar ma sian ganup buhu, sada be jolma boruboru.

I do alana umbahen jotjot dialushon angka inaina, tu angka anakkonna uju disungkun huta ni hulahula ni inangna i manang di dia. Ia so olo inangna i paboahon i, ala ni pogos ni hulahulana manang ala ni aha na asing, gabe didok ma: “Na mapultak sian bulu do ahu madekdek sian langit! Unang ho parigatrigat bulung, mangarigati bulung gaol, mangarungkai hinalungun, sumungguli hinadangol di pangarohaingki!”.

Dilaonlaon ni ari magodanggodang asimun ma anak na onom i dohot boru na tolu i, gabe humolso ma Manukmanukhulambujati. Beha ma behenonku mangaramoti i ninnarohana di bagasan. Jadi didok ma tu Leangleangmandi “Laho ma ho manungkunhon tu Mulajadi Nabolon, manang beha bahenonku anak angka naung magodang on!” Jadi dipatolhas ma tona i. Jadi didok Mulajadi Nabolon ma tu Leanglaeangmandi: “Ale Leangleangmandi, dokkon ma tu Manukmanukhulambujati, mangalehon boru na tolu i tu Debata na tolu, gabe niolina be”. Dung i dipadas Leangleangmandi ma i, jadi dilehon Manukmanukhulambujati ma, sada boru nioli ni Bataraguru, sada nioli ni Sorisohaliapan, sada nioli ni Balabulan.

Dung i disuru Manukmanukhulambujati ma Leangleangmandi untunguntung na bolon, patolhashon tona tu Mulajadi, ninna ma: “Nunga marnioli na tolu halak i, alai dia ma di si Raja Odapodap, di tuan Hurmajati, dohot di Raja Padoha?” Dung tolhas tona i di bahen Leangleangmandi, didok Mulajadi Nabolon ma tu Leangleangmandi: “Dok ma tu Manukmanukhulambujati: Ahu do manarihon i! Ingkon paimaon nasida tubu ni na tolu ondeng, gabe niolina muse. Masipaima rongkapma do bangko ni na tubu!”

Dung tolhas i dibahen Leangleangmandi, sonang ma roha ni Manukmanukhulambujati paima tingki binagabagahon ni Mulajadi Nabolon.

Sumber: Dikutip Dari Buku Pustaha Batak Tahun 1991

Pambahen ni Mulajadi Nabolon Jumadihon anakna di Banua Ginjang

Manukmanuk Hulambujati Ima jumolo dijadihon Debata, marmunsung bosi, marsisilonhon golanggolang na marhillonghillong do i. Ianggo balgana, na salampulampu na bolon, tinaruna na sabalga ni hudon boruboru. Rpana sarung bintang humarairi. Di laonlaon ni ari, adong ma tinaru ni Manukmanuk hulambujati tolu kibung. Jadi tarhatotong ma rohana disi, ai gabe umbalga pira sian na mamirahon. Halongangan do i antong begeon.

Ala ni i martona ma Manukmanuk hulambujati tu leang-leangmandi untunguntung na bolon, ninna ma: E, leangleangmandi untunguntung na bolon! Asi ma roham, patandos ma jolo hatangku tu Ompunta Mulajadi, ai ndang huboto manang beha bahenonku tinarungku na tolu on, ai ulosanku pe so boi.

Jadi laho ma leangleangmandi patolhashon tona I tu Ompungta Mulajadi Nabolon, ninna ma: “Ale Ompung, dahanon di bosta do ahu na so marlaok botabota, na so lopa di hata na so lolos di tona, tona ni Manukmanukhulambujati: Beha do bahenonna tinaruna na tolu i?”

Dung i didok Mulajadi Nabolon ma: “Dokkon ma dipodomhon pirana i, ahu pe umbotosa. Alai boan ma ndi on sampulu dua putik dahanon,  dipangan ma i ganup putik di bagasan ganup bulan. Molo rumintop munsungna i, dilotakkon ma tu tinaruna i; i ma pasahat tu ibana”, ninna mandok leangleangmandi.

Dung i mulak ma leangleangmandi patolhashon tona I tu Manukmanuk hulambujati. Jadi diulahon ma songon nidok ni Mulajadi Nabolon i!

Dung gok sampulu dua bulan, rumintop ma tutu munsung ni Manukmanuk Hulambujati, dung i dilotakkon ma munsungna tu tinaruna i. Jadi mapuntar ma pira i, jala tubu ma sian ganup pira I songon jolma baoa. “Halongangan” do i, ndang boi hantusan sude panjadihon ni Debata.

Sian Pira Parjolo ima:
a)    Bataraguru
Bataragurudoli, Bataragurupanungkunan, Bataragurupandapotan, pandapotan ni nasa harajaon, sitiop timbangan di saluhut tinompana.
Mula ni gantang tarajuan, hatian sibola timbang, ninggala sibola tali, tu atas so ra mungkit, tu toru so ra monggal, tu lambung so ra teleng.

b)    Raja Odapodap
Si Debata Moelasongta, si Debata Moelasongti, I ma sipasongta sipasongti parrohaon di saluhut siulaon di na tinompana i.

Sian Pira Paduahon
a)    Debata Sori
Sori so haliapan, Sori so habubuhan na pitu hali malim, na pitu hali solam, sinolamhon ni ibotona siboru Panolaman. Na Marpanggoarhon siboru “Anting Malela”. Na so boi marsumpa, na so boi sumpaon. Na so boi manangko, na so boi panangkoan. I ma sibahen parsorion, sori gabe manang sori mago, manang bagian ni nasa jolma manisia. Tarida doi antong sian umpama ni hita Batak na mandok: “Andilo nahinan, hadangkadangan ma nuang, pinangido nahinan, jaloon ma nuang”. On do Debata sitongos Sisingamangaraja.

b)    Debata Dihurmajati.
I ma ompu ni Panenabolon na mangingani jala na mangkirdop-hirdop di ganup desa na bolon na opat i. Na margoar do i huhut Ompu Batuholing. Tolutolu bulan diingani sada desa, salpu i, laho do ibana tu desa na bolon na sada. Sai songon i do i mulahulak mangkaliangi parlangitan i.
Ianggo Ama Batuholing duadua borngin do i di ganup desa, jala sasaborngin do ia anakna si Batuholing disi. Asa songon na masilelean do nasida mangkaliangi topi ni langit i. I ma siulaon ni pinompar ni Tuan Dihurmajati tongtong, saleleng adong hasiangan on.

Sian Pira Patoluhon
a)    Balabulan.
Balabulan matabun-Balabulan na rubunan, na rubun di punsuna, Datu paratalatal, Datu parusulusul, parhoda sibaganding tua, parpiso simangan mangeluk, parhujur si dua ujung. I ma na marmulahon hadatuon tu jolma manisia.
Asa Debata Bataraguru - Debata Sori – Debata Balabulan, i ma na targoar: “Debata na tolu, na tolu suhu, na tolu harajaon”.

b)    Raja Padoha manang partanduk pitu.
I ma na maringanan di toru ni tano on, na parohon lalo.

Sumber: Dikutip Dari Buku Pustaha Batak Tahun 1991

Taringot Tu Sariburaja dohot si Borupareme.

Dung manang piga ari so diida Sariburaja be hahana si Raja Biakbiak, gabe ninna rohana ma: “Ndang tagamon so na mate be i, antong ahu nama jadi raja”. Gabe sumuan bulu ma ibana di lapanglapang ni babi; umpungka na so uhum dohot Borupareme marmulahon na so jadi, Ai di na laho Borupareme manaruhon indahan ni ibotona Sariburaja tu pangulaan, peut so peut ma dibahen si Borupareme abitna di soposopobalian. Jadi ro ma si Sariburaja, laos diangkupi ma ibotona i modom disi. Dung so marsomal nasida na dua i mardomudomu, gabe hira so hailaon be i di roha nasida.
   
Alai manang beha pe hamaloon ni si Sariburaja dohot Borupareme manabunihon harorangan nasida i, sai dapot do nidok ni umpama: Tiris ni hudon tu toru, tiris ni solu tu ginjang; ai dung marhangoluan si Borupereme, sai dibahen do nian nasa malona marabit, asa unang tarida naung dokdok pamatangna. Alai nang pe songon I, dapot do diboto amana dohot angka ibotona na deba nari. Gabe muruk ma roha ni amana dohot ibotona di parulaon si Sariburaja dohot Borupareme, disangkap nasida ma ingkon bunuon Sariburaja jala buangon si Borupareme tu tombak longolongo, ala so pir roha nasida manggotap uluna.

Dung tarbortik hata i tu pinggol ni Borupareme, mansai marsak ma rohana pasarisari tahi ni angka ibotona i, dipaboa ma huhut tu Sariburaja.

Ia dung dibege Sariburaja tahi ni amana dohot angka angina i, disangkap rohana ma laho ibana martabuni tu bona ni dolok Pusukbuhit, i ma na margoar Pariksabungan nuaeng. Diajari hian ma ibotona si Borupareme i,  ninna ma: “molo ingkon saut do buangon nasida ho tu tombak longolongo, usung ma satandoktandok sobuan, pampeuthon ma i otihotik di dalanmu i anggiat marhitehite i boi ahu ro manjalahi ingananmu”.

Dung songo i tubu ma roba ni Sariburaja manangko barang-barang ni natorasna, ninna rohana ma: “ndang be mian ahu hape di huta ni damang, tumagon ma hubuat arta na tau bagianku!” Jumolo ma dituktuhi sada batu na bolon di si bungbungruma bahen inganan ni ugasan i, dipauli hian ma denggan langkopna. Dung sidung i ditangko ma angka barang mas, ogung dohot tintin sipajadijadi, dipamasuk ma sudena i tu bagasan batu i so padohot tintin i, dilangkopi ma denggan jala dirapet, i ma na margoar Batuhobon nuaeng.

Ia tarbortik musa ma i tu angka anggina i barangbarang tinangko ni Sariburaja, gabe lam tarrimas ma roha nasida mida Sariburaja, jala putus ma pingkiran nasida mamunu ibana. Marporus ma Sariburaja tu Batunanggarjati na di atas ni Sibungbungruma, sian i tu harangan Sisunut, dolok ni Harianboho. Maporus muse sian i tu Batumartindi na di dolok ni Sabulan. Dung so dapot angka anggina i Sariburaja, mulak ma nasida.

Dung i didok nasida ma tu si Borupareme, “Ingkon saut ma ho buangkononhon tu tombak longolongo harangan rimbunrea, parhaishaisan ni babiat paranggunanggunan ni homang!” Umbege i tangis ma si Borupareme mangido ampun tu amana dohot tu angka ibotona i, ninna ma: “Ba galagala sitelluktelluk mardaguldagul; nunga hurang pambahenanki nangetnanget huapulapul”. Alai ndang olo melok roha ni amana dohot ibotona, saut ma diusung nasida ibana tu tombak longolongo, dompak dangsina ni Sianjurmulamula, dalanan sadari daona. Bornginborngin do diusung nasida ibana unang adong na marnida, jala asa unang diboto si Borupareme dalan mulak. Diboan nasida ma dohot sipanganon di si Borupareme, sae pitu ari lelengna.

Andoran mardalan i nasida diida do tandok na gok sobuon niusung ni si Borupareme jala disungkun manang bahen aha sobuon i. “Asa adong do bahenonku pangopanan ni api di tombak longolongo i, unang mate ngalian ahu”, ninna si Borupareme mangalusi.

Sai dipampeuthon si Borupareme ma sasaotik sobuon i di sandok nidalanan nasida i. Dung sahat nasida tu tombak i dipauli nasida ma lapelape ni si Borupareme. Dung songon i ditinggalhon nasida ma si Borupareme disi. Dung i mulak ma nasida. Dung i tuat ma nasida dompak topi ni tao Toba, dalan na asing nama didalani nasida laho mulak. Dung sahat nasida tu rura, marbulan ma nasida disi na so jadi paboaon nasida inganan ni Borupareme tu manang ise. I ma Alana umbahen digoar deba halak rura i “Sabulan” (negeri Sabulan nuaeng).

Ia Sariburaja tongtong do sai laho ibana mangkahapi dalan tu Sianjurmulamula, asa diboto manang naung ditaruhon angka angina i ibotona si Borupareme. Jadi dung adong tolu ari si Borupareme di tombak i, dapot Sariburaja tu inganan ni si Borupareme, didapot ma si Borupareme tangis sosombopon jala mangandungandung: “Sihampir gabe gambir ma ahu da inang tading gabe toras; tu dia pe so tampil tu begu aha pe sobolas”. Laos tangis muse ma dohot Sariburaja. Dung rap nasida disi tolu ari lelengna, sude ma sipanganon nasida i, jadi marsak situtu ma nasida pasarisari sipanganonna na soada be; ai angka hube nama dipangani nasida.

Ala na so adong aek na jonok tu inganan i munsat ma nasida sia i tungkan toruan, dipajok ma soposopona disi. Andorang na pauli soposopo i nasida, pajumpang ma nasida dohot babiat sibolang; jadi pintor disoro ma Sariburaja jala dipabongot ma tangan ni Sariburaja tu pamangan ni babiat sibolang i. Ianggo di roha ni si Borupareme na lao mamolgak nama babiat sibolang di tangan ni Sariburaja i, hape holan na dipanjukjukkon babiat do tanganna i tu aruaruna, ala amporotan babiat i dibahen rusuk ni aili. Jadi manganto ma roha ni Sariburaja diroro ma holiholi ni aili sian aruaru ni babiat i, hinorhon n ii diapusapus babiat i ma Sariburaja. “Inang da ba inang, rupa na mamolgak hami nama on huroha babiat on”, ninna roha nasida, ala ni marlojong ma nasida maporus.

Hape bodarina i ro ma babiat i manaruhon sada aili, dipeakkon ma it u pintu ni soposopo nasida i. Sai ditarui babiat i do tu Siborupareme juhut aili, ursa ganup tolutolu borngin. Laos marpadan ma Sariburaja dohot babiat sibolang i, na so jadi masiagoan nasida ro di pinomparna. Bulung ni pirdot do partanda sitiopon ni pinompar ni Sariburaja, asa unang dihahua babiat sibolang nasida ia tung pajumpang. I do Alana umbahen sai tar dihandangi pinompar ni Sariburaja bogas ni babiat.

Sumber: Dikutip Dari Buku Pustaha Batak Tahun 1991

Taringot Tu Raja Biakbiak

Ia Raja Biakbiak, margoar huhut Raja Gumelenggeleng na songon gumul do ibana ndang martangan, ndang marpat jala so boi hundul. Ibana do na lumea di bagasan rohana, ala so martihas angka anggina.

Mangihuthon baritana ro do sahali Mulajadi Nabolon. Tuat tu Sianjurmulamula sorang tu Guru Tateabulan mangunjuni rohana, ai dipangido ma anakna Sariburaja seatonna.

“Ba saguru di Ho do Ompung!” ninna Guru Tateabulan mangalusi. Umbege i, didok Raja Biakbiak ma tu inana: “O inang! Hubege dioloi amanta nangkining seaton ni Ompunta Mulajadi Nabolon si Sariburaja, ianggo di rohangku, ahu do na naeng seatonna; ai aha ma ahu martimbangkon Sariburaja na so martihas i? Asa ianggo siat pangidoanku suru ma damang manabunihon ahu; ai atik pe songon on partubungku ahu do sipultak bajubajum!”

Umbege hata ni Raja Biakbiak inana  i, disuru ma guru Tateabulan manabunihon Raja Biakbiak tu dolok Pusukbuhit.

Dung nangkok Mulajadi Nabolon tu bagas, dipangido ma Sariburaja seatonna, jadi dilehon inana i ma. Didok Mulajadi Nabolon ma : “Tiop ma patna i!” Jadi ditiop ma tutu. Dung i diseat ma jala ditanggoi.

Nunga dihodohon hian pangalompaanna i. Ia dung sidung ditanggoi dipambahenma tu pangalompaanna i asa pamasahonna.

Dung ro di pangalompaanna i, manggora ma Mulajadi Nabolon didok ma: “Na olo gabe Sariburaja, ruar ma ho sian i!” Jadi mangangkat ma tutu Sariburaja sian i, laos hundul ma ibana tu halangulu. Nunga songon garage ibana, songon garugu; na sada songon na pitupulu.

Mangihuthon pandok ni na deba, sian angka na tinggal i laos manjadi ma ragam ni pahanpahanan.

Ia di tingki na laho mulak Mulajadi Nabolon tu banua ginjang, sian dolok Pusukbuhit do ibana manaek. Jadi jumpangsa ma disi Raja Biakbiak: “Ise na mamboan ho tuson?” ninna Mulajadi Nabolon manungkun ibana.

“Ianggo i da ompung, na mabiar do ahu di biarhu, matahut di tahuthu! Hubege nangkining diondam Ho da Ompung seatonmu Sariburaja, anggo di rohangku ahu do na naeng seatonmu; ala na martihas i ahu. Gabe hupangido tu dainang asa disuru damang manaruhon ahu tuson. Ai ahu do sipultak bajubaju ni dainang.”

"Ba naeng marsomba tu ho di roham angka pinompar ni anggim dohot ibotom?” ninna Mulajadi Nabolon.

“Naeng ma tutu, ai ahu do sihahaan, ahu do na patut rajanasida!” ninna Raja Biakbiak.

“Antong molo songon i, beha, olo do ho tumpaonku?”

“Ba olo do ahu, asalma marsomba tu ahu angka pinomparni anggingku dohot ibotongku!” ninna Raja Biakbiak.

Jadi ditumpa Mulajadi Nabolon ma Raja Biakbiak di dolok Pusukbuhit i, Gabe, marpat, martangan, alai songon munsung babi (Santabi) do munsunga.

Mangihuthon pandok ni na deba marhabong do ibana. Dibahen ma goarna Tuan Rajauti; raja na so ra mate, raja na so ra matua. Sian punsu ni dolok Pusukbuhit i, dipahabang Mulajadi Nabolon ma Ibana tu ujung Aceh.  

Sumber: Dikutip Dari Buku Pustaha Batak Tahun 1991

Si Raja Batak

Ianggo anak ni ompunta Raja Batak dua do, I ma: Guru Tateabulan na margoar huhut si Mangarata dohot Raja Isumbaon.

Ia dung Mangoli be nasida, didok nasida ma tu amana: “Ale amang, aha do bagian silehononmu di hami be paboa anakmu hami amanami ho?”

Dung i dialusi Raja Batak ma hata ni anakna i, didok ma: “Ba ia i na adong di ahu da amang, i ma sibagionmuna! I ma adat, sibagion ni anakna do pinungka ni amana”.

Dung i didok anakna dua i ma muse: “Olo denggan ma i, tutu amang na nidokmi, alai ndada holan i na hupangido hami. Lehon ma di hami, na so dung huida jala na so dung huboto hami.

“Ia na pinangidomuna i, ndang tarpatupa ahu i; alai rap ma hita mangido i tu Ompunta Mulajadi Nabolon”.
Dung songon i, dibuat nasida ma manuk lahibini mamele Debata Mulajadi Nabolon dohot Debata Natolu. Jadi martonggo ma Raja Batak, didok ma: “Hujou hutonggo ma badia ni gurungku Debata Natolu, na tolu gugun, na tolu harajon, sian huta ni da ompung Ompu Raja Mulamula, Ompu Raja Mulajadi. Mula ni dungdang, mula ni sahala. Siuntunguntung na bolon, sileangleangmandi, si Raja Indainda, si Raja Indapati: na pajujungjujung pinggan di hos ni mata ini ari. Na hinsa suruon, na girgir mangalapi; na sintak sumunde, na uja mamintari. Siboto unungunung na uja mananginangi, na pabuhabuha pintu, na padungdangdungdang langit, na pasoropsorop ombun di  gorjokgorjok ni ari. Ambeambe na somurung, sitapi manjalahi; na patorustorus somba tu Ompunta Mulajadi, Ompu ni Balemantabun di horbo inaina. Tuat ma hamu da Ompung sian banua ginjang, sian ginjang gininjangan, sian langit ni langitan, sian ombun na pitu lampis, sian langit na tolu tingko. Tuat ma hamu da Ompung, ambit mula tuan, modom mula monang, sangkap mula ingot, dungdang mula dudu, tortor mula gondang. Tangkas huboto do hamu ro sian banua ginjang parlintong gumajogajo, paraek gumojokgojok. Parbatu galanggalangan, parjorojoro sipitu sundut, partungkup bale pasogit, parmanukmanuk patia raja. Parhoda sibaganding, pargiringgiring siantar sabungan, parpinggan pasu na uli. Na rumajahon mombang boru, pangeateatan ni Ompunta Mulajadi Nabolon. Asa tongos ma da Ompung, sahala tua, sahala harajaon, bagian ni anakku da dua on!

Asa parsige bulu sitiga goligoli
Diparintar ma jambulan, dipaneang holiholi.

Dung i laos ditonggo muse ma Debata Natolu.
Ia dung songon i, ditongos Mulajadi Nabolon ma dua balunbalunan surat Batak. Dibalunan parjolo, surat agong; I ma bagian ni Guru Tateabulan, jala tarsurat disi: hadatuon, habeguon, parmonsahon dohot pangliluon.

Di balunan paduahon, surat tombaga holing i ma bagian ni Raja Isumbaon tarsurat do disi; harajaon, paruhumon, parumaon, partigatigaon dohot paningaon.

Ndang tangkas binoto manang ise do niolini Guru Tateabulan dohot Raja Isumbaon, alai adong do ianakkonnasida be. Sian i ma dapot botoon, adong do niolininasida be.

Ia tubu ni Guru Tateabulan,  sia halak do; lima do i anakna jala opat boruna.

Goar ni angka anakna i, i ma:

1. Raja Biakbiak
2. Tuan Sariburaja margoar huhut Ompu Tuan Rajadoli
3. Limbongmulana
4. Sagalaraja
5. Silauraja (Malauraja)

Ianggo goar ni boruna:

1. Si Boruparomas (Si Boruanting-antingsabungan)
2. Si Borupareme
3. Si Borubidinglaut
4. Nan Tinjo

Ia anank ni Raja Isumbaon, i ma:

1. Sorimangaraja
2. Raja Asiasi margoar huhut Tunggulnijudi
3. Sangkar Somalindang (Langkasomalindang)

Songon on ma partording ni partubunasida.

Jumolo do sinurathon barita ni pinompar ni Guru Tateabulan mangihuthon partording ni baritana, i pe asa pinompar ni Raja Isumbaon.

Sumber: Dikutip Dari Buku Pustaha Batak Tahun 1991